Sizi Azərbaycanda böyük məmnuniyyətlə salamlayır, Bakı Enerji Həftəsi çərçivəsində keçirilən 30-cu Yubiley Beynəlxalq Xəzər Neft və Qaz Sərgisi, 13-cü Xəzər Beynəlxalq Energetika və Yaşıl Enerji Sərgisi, eləcə də 30-cu Yubiley Bakı Enerji Forumunun açılışı münasibətilə təbrik edirəm. 

Ulu Öndər Heydər Əliyevin beynəlxalq enerji məkanında Azərbaycana etibarlı tərəfdaş statusu qazandıran neft strategiyasının bəhrəsi olan bu platforma, bu gün Xəzər regionunda yeni enerji təşəbbüslərinin reallaşmasına və əməkdaşlıq dairəsinin genişlənməsinə mühüm töhfə verir. 

Xüsusilə qlobal enerji sistemində baş verən dəyişikliklər, dayanıqlı enerji təchizatı ilə bağlı çağırışlar və yeni enerji mənbələrinin artan rolu fonunda enerji təhlükəsizliyinin hələ də qlobal gündəliyin prioritet məsələsi olması Azərbaycanla enerji tərəfdaşlığına marağı artırır. Ölkəmizlə təkcə neft və qaz deyil, həm də “yaşıl enerji” təchizatı sahəsində əməkdaşlıq əlaqələrinin qurulması, Xəzər dənizinin bərpa olunan enerjinin istehsalı, ixracı və tranziti üzrə strateji mərkəzə çevrilməsi aktuallaşır. 

Enerji resurslarına balanslı yanaşmaya və marşrutların müxtəlifliyinə əsaslanan rasional enerji siyasəti yürüdən ölkəmiz, Azərbaycan Respublikasının Prezidenti cənab İlham Əliyevin strateji vizyonuna uyğun olaraq bu gün Xəzər və Mərkəzi Asiya regionları ilə Avropa arasında “yaşıl enerji dəhlizi” təşəbbüsləri ilə çıxış edir. Xəzər-Qara dəniz-Avropa”, “Azərbaycan (Naxçıvan)-Türkiyə-Avropa”, “Mərkəzi Asiya-Azərbaycan-Avropa” və “Azərbaycan-Gürcüstan-Bolqarıstan-Türkiyə” interkonnektorları gələcəkdə Azərbaycanı bərpa olunan enerjinin əsas ixracatçılarından birinə, “yaşıl enerji”nin nəqli üzrə strateji hab mərkəzinə çevirəcək və ölkəmizin qlobal enerji təhlükəsizliyindəki mövqeyini daha da möhkəmləndirəcək mühüm layihələrdir. 

Xəzər hövzəsində Cənub Qaz Dəhlizi və “yaşıl enerji” dəhlizləri çərçivəsində geniş əməkdaşlıq imkanları bir daha göstərir ki, Bakı Enerji Həftəsi uzun illər boyu iştirak edəcəyimiz və mühüm təşəbbüslərin irəli sürüldüyü platforma olaraq qalacaqdır.  

İnanıram ki, qarşılıqlı faydalı əməkdaşlığımız ölkələrimizin inkişafına və daha geniş coğrafiyada enerji təhlükəsizliyinin təmininə mühüm töhfə verməyə davam edəcək, Bakı Enerji Həftəsi isə dayanıqlı enerji gələcəyinin qurulmasında bizə etibarlı yol göstərən dialoq məkanı olacaqdır. 

Bakı Enerji Həftəsinin bütün iştirakçılarını Beynəlxalq Xəzər Neft və Qaz Sərgisi və Bakı Enerji Forumunun 30-cu yubileyi münasibətilə bir daha təbrik edir, hər birinizə uğurlar arzulayıram! 

Hörmətlə, 

Pərviz Şahbazov 
Azərbaycan Respublikasının energetika naziri  

Sizi Azərbaycanda ənənəvi olaraq keçirilən “Bakı Enerji Həftəsi”ndə, o cümlədən 30-cu yubiley Beynəlxalq Xəzər Neft və Qaz Sərgisində, 13-cü Xəzər Beynəlxalq Energetika və Yaşıl Enerji Sərgisində və 30-cu yubiley Bakı Enerji Forumunda salamlamaqdan böyük məmnunluq duyuram.  

Azərbaycanın yeni enerji strategiyasının müəllifi, xalqımızın Ümummilli Lideri Heydər Əliyevin təşəbbüsü ilə ilk dəfə 1994-cü ildə keçirilən Beynəlxalq “Xəzər Neft və Qaz Sərgisi” ötən illər ərzində regionda enerji təhlükəsizliyinə, dayanıqlı tərəqqiyə, səmərəli əməkdaşlığa mühüm töhfə verən çoxşaxəli platformaya çevrilib.  

Azərbaycan Respublikasının Prezidenti cənab İlham Əliyevin müasir dövrün çağırışlarına uyğun davam etdirdiyi milli enerji strategiyamız bu gün, ənənəvi enerji sahələrinə söykənərək ölkəmizdə həm də innovativ və “yaşıl” iqtisadiyyata keçidin nümunəvi modelini təzahür  etdirir.  

Azərbaycanın təşəbbüsü və birbaşa iştirakı ilə həyata keçirilən strateji əhəmiyyətli enerji layihələri regionun və Avropanın enerji təhlükəsizliyinin ayrılmaz tərkib hissəsinə çevrilib. İxrac coğrafiyasını daha da genişləndirən Azərbaycan bu gün 12 dövləti, o cümlədən 10 Avropa ölkəsini təbii qazla təchiz edir. 

2030-cu ilə qədər “Təmiz ətraf mühit və yaşıl artım ölkəsi”nə çevrilməyi sosial-iqtisadi inkişafa dair beş milli prioritetdən biri kimi müəyyənləşdirən Azərbaycan  bərpa olunan enerji sahəsində də zəruri addımlar atır. Ötən il  ölkəmiz COP29 tədbirinə uğurla ev sahibliyi edərək ətraf mühitin mühafizəsi, enerji keçidi, dekarbonizasiya və iqlim dəyişiklikləri ilə mübarizə məsələlərində qlobal miqyasda həmrəyliyin təmin olunması istiqamətində mühüm nailiyyətlərə imza atdı. 

Milli brend və qlobal enerji şirkəti olan SOCAR strateji hədəflərinə uyğun olaraq neft-qaz şirkətindən beynəlxalq enerji şirkətinə transformasiya istiqamətində məqsədyönlü fəaliyyətini uğurla davam etdirir. Ötən il Bakı Enerji Həftəsi çərçivəsində SOCAR ilə Birləşmiş Ərəb Əmirliklərinin “Masdar” şirkəti arasında üç bərpa olunan enerji layihəsi üzrə Səhmdarlar Sazişləri , həmçinin COP29 çərçivəsində SOCAR, “Masdar” və “ACWA Power” şirkətləri arasında Xəzər dənizinin Azərbaycan sektorunda 3,5 giqavatlıq külək elektrik enerjisi istehsalı üzrə əməkdaşlıq barədə Anlaşma Memorandumu imzalandı. SOCAR-ın tərəfdaşlarla birgə həyata keçirdiyi layihələr Azərbaycanın bərpa olunan enerji potensialının inkişafına, regional əməkdaşlığa və enerji təhlükəsizliyinin təmin olunmasına dəyərli töhfə verir.   

Qlobal miqyasda metan emissiyalarının azaldılması sahəsində ciddi niyyətini və bu istiqamətdə elan etdiyi dekarbonizasiya hədəflərinə sadiqliyini nümayiş etdirən SOCAR 2024-cü ildə “OGMP2.0” tərəfdaşlığına qoşuldu. SOCAR, həmçinin “ESG” (Ətraf mühit, Sosial və İdarəetmə) ilə bağlı aparıcı beynəlxalq reytinq agentliyi olan “MSCI” şirkəti tərəfindən 2024-cü il üzrə BBB ilkin reytinqini əldə edib. Bu nailiyyət SOCAR-ın karbon emissiyalarının və tullantıların azaldılması, ictimaiyyətlə əlaqələr, biomüxtəliflik, sağlamlıq və təhlükəsizlik, idarəetmə və şəffaflıq sahələrində əldə etdiyi uğurların təzahürüdür. 

Hörmətli tədbir iştirakçıları, 

Bakı Enerji Həftəsi mühüm enerji məsələlərinin geniş müzakirə olunduğu, ən son texnologiyalar və rəqəmsal həllər üzrə təcrübə mübadiləsinin aparıldığı nüfuzlu platforma olaraq iştirakçılara faydalı əməkdaşlıq imkanları təqdim edir. İnanıram ki, bu ilki tədbirlər də dünyanın aparıcı enerji şirkətlərini bir araya gətirməklə, Bakı Enerji Həftəsinin qlobal enerji təhlükəsizliyinin təmin olunması, mövcud çağırışların həlli və enerji sektorunun dayanıqlı inkişafında oynadığı rolu daha da möhkəmləndirəcəkdir.  

Ən xoş arzularla, 

Rövşən Nəcəf 
SOCAR-ın prezidenti 

Təşkilat Komitəsi adından Sizi 30-cu Yubiley Bakı Enerji Həftəsi münasibətilə ürəkdən salamlayırıq — regionun ən nüfuzlu və ən əhəmiyyətli enerji tədbirlərindən biri.

30 il öncə, Azərbaycanın müstəqilliyini bərpa etdiyi ilk illərdə ölkəmiz enerji sektorunda müstəqil siyasətinin əsasını qoymağa başladığı bir dövrdə, ümummilli lider Heydər Əliyevin təşəbbüsü və dəstəyi ilə ilk Caspian Oil & Gas sərgisi təşkil olundu. Bu mühüm hadisə yalnız ölkəmizdə ilk ixtisaslaşmış beynəlxalq sərgi olmaqla kifayətlənmədi, həm də tarixə düşən “Əsrin Müqaviləsi” ilə eyni dövrdə baş tutaraq Azərbaycanın müasir enerji siyasətinin təməlini qoydu və ölkəmizin qlobal enerji bazarında aparıcı oyunçular sırasında yerini möhkəmləndirdi.

Ötən illər ərzində Bakı Enerji Həftəsi dövlət qurumları, işgüzar dairələr və sahə üzrə ekspertlər arasında dialoq üçün nüfuzlu beynəlxalq platformaya çevrilmiş, beynəlxalq enerji əməkdaşlığının inkişafına mühüm töhfə vermişdir.

30-cu Yubiley Bakı Enerji Həftəsi çərçivəsində 30-cu Xəzər Beynəlxalq Neft və Qaz Sərgisi, 13-cü Xəzər Beynəlxalq Energetika və Yaşıl Enerji Sərgisi və 30-cu Bakı Enerji Forumu keçirilir. Bu tədbirlər hər il enerji sektorunun nüfuzlu nümayəndələrini bir araya gətirərək Azərbaycanın beynəlxalq enerji məkanındakı əhəmiyyətli rolunu bir daha təsdiqləyir.

Azərbaycan Respublikasının Prezidenti cənab İlham Əliyevin tədbirin açılış mərasimində iştirakı Bakı Enerji Həftəsinin yüksək statusunu və ölkə üçün strateji əhəmiyyətini nümayiş etdirir.

Bu il tədbirdə 30 ölkədən 200-dən artıq şirkət iştirak edir. Almaniya yenə də sərgidə milli stendlə təmsil olunur, iştirakçıların 15%-i yeni şirkətlər, 40%-i isə sərginin daimi və tanınmış iştirakçılarıdır. Sərgidə ilk dəfə olaraq Slovakiya nümayəndə heyəti də iştirak edir.

Builki sərginin əsas yeniliklərindən biri isə “Neft-qaz sənayesində Süni İntellekt” sektoru olacaq və bu mövzu sərginin işgüzar proqramında da mühüm yer alacaq.

Dəyərli işgüzar proqramın əsas tədbiri Bakı Enerji Forumu olacaq və burada 800-dən artıq sənaye lideri bir araya gələrək enerji sektorunun gələcəyinə dair fikir mübadiləsi aparacaq.

Fürsətdən istifadə edərək, Azərbaycan Respublikası Energetika Nazirliyi, SOCAR və Bakı Enerji Həftəsinin bütün tərəfdaş və sponsorlarına tədbirin təşkilinə göstərdikləri dəstəyə görə dərin minnətdarlığımızı bildiririk.

Bu əlamətdar yubiley münasibətilə bütün iştirakçılara və qonaqlara uğurlar, məhsuldar görüşlər, yeni tərəfdaşlıqlar və gələcək üçün yeni perspektivlər arzulayıram.
 

Ən xoş arzularla,
Edvard Straçan
ICA Events şirkətinin baş icraçı direktoru

Azərbaycan Sərgi Təşkilatçıları Assosiasiyası adından Sizi “Bakı Enerji Həftəsi”ndə səmimi-qəlbdən salamlayıram! 

Artıq 30-cu dəfədir ki, bu möhtəşəm layihə ölkəmizin sərgi sənayesi tarixində və Azərbaycanın sosial-iqtisadi inkişafında xüsusi yer tutur. Xüsusilə qeyd etmək istərdim ki, “Bakı Enerji Həftəsi”nin tərkib hissəsi olan və 1994-cü ildə Ümummilli Lider Heydər Əliyevin təşəbbüsü ilə keçirilən “Caspian Oil and Gas” sərgisi müstəqil Azərbaycanın ilk beynəlxalq sərgisi kimi milli sərgi sənayesinin formalaşması üçün möhkəm zəmin yaratdı. 

Bu gün “Bakı Enerji Həftəsi” regionun ən vacib tədbiri olmaqla, aparıcı dünya şirkətlərini bir araya gətirir, sahənin əsas tendensiyalarını müəyyən edir və Azərbaycanın dünya enerji ictimaiyyətinə strateji pəncərəsi kimi çıxış edir. “Bakı Enerji Həftəsi” çərçivəsində keçirilən sərgilər və forumlar digər peşəkar layihələrin yaradılması üçün nümunəyə çevrilərək, ölkəmizin iri biznes tədbirlərinin keçirilməsi üçün müasir beynəlxalq meydança kimi nüfuzunu möhkəmləndirib. 

Bu əlamətdar yubiley münasibətilə bütün təşkilatçıları, iştirakçıları və tərəfdaşları ürəkdən təbrik edirəm! Yeni təşəbbüslərin reallaşdırılmasında uğurlar, səmərəli ünsiyyət, faydalı əməkdaşlıqlar və “Bakı Enerji Həftəsi”ndən xoş təəssüratlar arzulayıram. 

Hörmətlə, 

Fərid Məmmədov 
Azərbaycan Sərgi Təşkilatçıları Assosiasiyasının İdarə Heyətinin sədri